أحلامنا كتيرة و ما لهاش حد

مين عارف إيه اللي هيجرى

و لا واحد فينا أحسن من حد

و هيعرف إيه هيحصل بكره

فيه ناس أحلامها صغيرة

لكن بالنسبة لها كبيرة

فيه ناس أحلامها منورة

و ناس أحلامها خطيرة

واحد حلمه يعيش مستور

و يحب الناس و يحبوه

و دايما كده عايش مسرور

و بيتمنى الخير لأخوه

وواحد حلمه إن رصيده

في البنك يزيد يوم ورا يوم

و ناسي في عز الحلم حبيبه

اللي وهب له نعم بالكوم

واحد حلمه أنه يلاقي

لقمة بسيطة تسد الجوع

مسكين بيدور مش لاقي

و عينيه مليانه كده دموع

وواحد حلمه أنه يعيش

حياته كده بالطول و العرض

عايز ياخد و لا يعطيش

كأنه مش عايش على الأرض

واحد حلمه أنه يخلص جامعته

و يدور على شغل

و بكده راح تكمل فرحته

لكن يا خسارة ده شيء مش سهل

وواحد حلمه إزاي يصرف

الثروة اللي جناها أبوه

و لا عايز يتعلم و لا يعرف

و كل صحابه و أهله سابوه

واحد أحلامه بتسبقه

وواحد أحلامه تغرقه

واحد أحلامه جميلة

و هدفه أنه يرضي الله

وواحد أحلامه خطيرة

و بيقضي بإيده على هناه

و أنا باحلم كده ييجي اليوم

اللي الناس راح تعرف فيه

إن الحلم ما هوش مذموم

لكن إيه راح تحلم بيه

اللي أحلامه حقيقي نبيلة

و هدفه دايماً هو الله

تلقى حياته بجد جميلة

و تقول الله يا عليه الله

لازم نعرف قبل ما نحلم

أن العمر ما هوش ممدود

إلحق قبل الفرصة ما تخلص

ده فعل الخير ما لهوش حدود