اسمحوا لي أشارككم حكاية شخص اتعلمت منه كتير اوي إنسان عزيز على قلبي جداً أخ اكبر و صديق ، إنسان كان السبب الأكبر في الكنز الكبير اللي ربنا أنعم بيه عليا ، ببساطته و تلقائيته و محبته اللي بتخللي كلامه يدخل القلب قبل العقل ، بحبه و تواضعه اللي مالهومش زي ، بكل الصفات الجميلة الحلوة اللي اجتمعت في شخص واحد إسمه محمد حمودة
الراجل الطيب ده مثال حقيقي للرضاء متجسد في بني آدم دايماً راضي و مبسوط و ما بيزعلش من حد و لا بيحب يزعل حد ، دايماً بيعطي من غير ما ينتظر مقابل بالعكس بيكون المقابل بتاعه أنه فرحان أن ربنا أعطاه الفرصة لكي يعطي كمان و كمان
النهارده سمعت أنه تعبان و كان عنده جلطة في القلب و لسه خارج من العناية المركزة و اتصلت بيه علشان أطمئن عليه لقيته بيضحك و هو اللي بيطمنني و عارفين بيقول لي إيه؟ بيقول لي يا أحمد يا أخويا أنا كل اللي مزعلني إني إضطريت أفطر يومين ورا بعض تخيلوا أد إيه الإنسان ده جميل و بيحب ربنا و إيمانه في منتهى العمق
حبيت أبعت له لمسة وفاء لكل الحاجات الحلوة اللي اتعلمتها منه و يا رب يشفيه و يبارك فيه و نتعلم منه كمان و كمان

راجل طيب و فاعل خير
و لا عمره أبداً زعل حد

دايماً يحب يساعد الغير
حمودة و الله ما زيه حد

إنسان حقيقي بجد أمير
ده هو ده الإنسان بجد

مهما حصل أو كان فيه إيه
ما عمره أبداً قال الآه

بادعي له ربنا يشفيه
و أقوله الله عليك الله

دايماً بترضى بالقضاء
و تقول ماليش إلا الدعاء

مثال حقيقي للوفاء
و هداية من رب السماء

شخصية نادرة الوجود
جواها حب ما لوش حدود

طيب أوي و شهم وودود
دايماً بيوفي بالوعود

حقيقي أنا اتعلمت منك
و لسه هاتعلم كمان

عمري في يوم ما هانسى إنك
وصلتني لبر الأمان

حقيقي متشكر لأنك
علمتني معنى الإيمان