ازاي ممكن أعيش مطمن
في عالم مليان بالأهوال

نفسي أطبق تعاليم ديني
نفسي أعيشها في كل دقيقة

نفسي الحب يعم الكون
و بكده يبقى الحلم حقيقة

نفسي حقيقي أقدر أطبق
اللي الدين بيقول لي عليه

بس دي حاجة عايزة شجاعة
و أنا مش قادر طيب ليه؟

يمكن علشان دايما شايف
إن المادة هي الحل

أو يمكن علشان مش عارف
إن البعد عنك سهل

و اني لو ما حاولتش دايماً
أني أقرب منك أكتر

عمري في يوم ما هاكون مرتاح
و هاندم أكتر و أكتر و أكتر

ده أنا لو عشت حياتي حقيقي
زي ما ربي عايزني أكون

و حسيت فعلاً إنه صديقي
هابقى حقيقي صحيح ممنون

و هاعرف إن طريقه سعادة
و احكي لكل حبايبي عليه

و ألقى الخير جاي لي بزيادة
و أفضل أشكر ربي عليه

الناس قالوا عليا ضعيف
علشان باتسامح و باحب

لكن أنا هنا عايز أضيف
إن القوة في قرب الرب

عايز تبقى أقوى الناس
خليك أقرب كده من ربك

إدعي و حب كل الناس
هتلاقي ربك دايماً جنبك

إوعي تفكر إن القوة
هي الحل لكل مشاكلك

دور على القوة الحقيقية
تلقاها دايماً جوه في قلبك

لما تقرب كده من ربك
راح تحلى حياتك و تنور

تلقى ربك أوي بيحبك
و بيقرب لك أكتر و أكتر

نفذ بالحب كده أوامره
و إوعى تنسى فضله عليك

لما تطيع لربنا أمره
هيحبك و هيرضى عليك

يلا نشجع بعض بجد
إننا نبدأ صفحة جديدة

من النهارده مش من الغد
ننوي و نبدأ بداية جديدة

ربك عمره ما يخلف وعد
هترتاح و تعيش عيشة سعيدة