إيه اللي حصل في الدنيا ؟ ليه ما حدش فينا راضي بنصيبه ؟ ليه كلنا دايما عايزين أكتر؟ ليه دايما اللي معانا مش بيكفينا ؟ ليه كل واحد بيبص على اللي في إيد غيره و ناسي النعم الكتيرة اللي ربنا أنعم بيها عليه؟ ليه دايما هدف الناس كلها المادة ؟ ليه ما حدش مبسوط و سعيد ؟ ليه  و ليه و ليه ……؟
و في وسط كل ده الإنسان الوحيد اللي هتلاقيه مبسوط  و سعيد هو الإنسان الراضي القنوع اللي قلبه فعلا مليان بحب ربنا و زي ما بيحب الخير لنفسه بيحبه لغيره ، علشان كده اسمحوا لي أكتب حاجة عن الرضا و أفكر نفسي معاكم بأهمية الرضا و أن السعادة الحقيقية هي في الرضا مش في حاجة تانية

لو ترضى يا بن آدم
كل حياتك تحلو

لو ترضى بأمر ربك
و تبطل كلمة لو

خليك دايماً كده راضي
خليك كده فاعل خير

إوعى يكون قلبك فاضي
من حب الله و الغير

ليه دايماً شايف إنك
ناقصك في الدنيا كتير

يمكن يا حبيبي لأنك
بتفكر فيها كتير

دي الدنيا حقيقي غرورة
و أيامك فيها قليلة

لو ترضى حقيقي بجد
راح تلقى الدنيا جميلة

دي قناعتك كنز كبير
تملا حياتك بالحب

و البعد عنها خطير
و بيعمي العين و القلب

لو ترضى هتبقى سعيد
و ربك هيحبك جداً

و الخير و البركة تزيد
و لا يمكن تخسر أبداً

ربك خلقك و اداك
من نعمه كتر و كتير

لو قلبك صافي حقيقي
راح تبقى لكرمه أسير

إرضى دايماً بنصيبك
و إوعاك كده تحسد غيرك

راح يبقى الكل حبيبك
و ترضي ربك و ضميرك