كل سنة و انتي طيبة يا بنتي

يا أحلى ابتسامة و نور حياتي انتي 

مريم يا جميلة عقبال ميت سنة

و يا رب يا بنتي دايما عايشة في فرح و هنا

كل سنة و انتي بتحبي ربنا

ده بيكي الدنيا أحلى في عيون مامتك و أنا

ده أول لما تصحي حقيقي  باكون سعيد

و أقول أحلى بداية جميلة ليوم جديد

و لما تضحكي حياتي بتختلف

و ساعات بتعيطي لما بنختلف

و بسرعة بتسامحيني و بتيجي تحضنيني

و بحب بتبوسيني و تفضلي تواسيني

ده انا من غيرك حياتي ما لهاش طعم و لا لون

و معاكي  بتحلى أوقاتي و باحب كل الكون

ده انتي البركة في حياتنا و الخير و الحب كله

ده انتي شمعة بنورها نورتي العالم كله

من أول ما اتولدتي حقيقي الرزق زاد

و حياتنا اتغيرت كده من غير ميعاد

لو أقولك أد إيه أنا اتعلمت منك

و الناس قال إيه فاكرة إني باعلمك

علمتيني المحبة علمتيني التسامح

و بتحني عليا حتى لما أظلمك

يا سلام على قلب الطفل لازم نتعلم منه

ما بيعرفش غير الحب و لا يزهق أبدا منه

يا سلام لو كلنا نبقى

أطفال بنحب الله

يا سلام لو يبقى هدفنا

دايما مرضاة الله