طول عمري كده واياهم

ماشي بما يرضي الله

و لا مرة غلطت معاهم

و العالم هو الله

كان كل الناس أحباب

كان كله أخوات و أصحاب

دايما بالكلمة الحلوة

تفتح كل الأبواب

و في لحظة اتقلب الحال

و الناس كلها قاطعوني

اتغيروا كده في الحال

وقفوا ضدي و عادوني

قالوا ده خاين و مخادع

قالوا كلام فعلا واجع

قالوا ده مؤمن بشيطان

قالوا ده رايح مش راجع

قالوا ده كافر مرتد

قالوا ده خطر على ديننا

ظلموني ظلم بجد

قالوا مش عايزينك بيننا

و ماحدش فيهم فكر

و لا واحد شغل عقله

و لا واحد قال أنا ادور

علشان يرضي الله ربه

لكن صدقوا بسهولة

كل الأكاذيب دي عليا

بقة بالذمة دي معقولة

بعد ما كانوا أحباب ليا

يا اخوانا ده رب العزة

قال في كتاب القرآن

لو فاسق قال كده كلمة

اتحقق من ده بيان

لحسن تندم و تقول

يا ريت اللي جرى ما كان

قال ربك إوعى في يوم

تغتاب غيرك وتذمه

وأنتم كده طول اليوم

بتجيبوا سيرتي وبتنموا

مرتد ده إه يا أخواننا

الردة دي يعني رجوع

و أنا ما رجعتش بالعكس

ده طريقي كله طلوع

و خيانة إيه يا جدعان

ده مش أكتر من كتمان

و الدين ده مكانه القلب

و ما هوش محتاج إعلان

و اللي يكفر إنسان

مؤمن بالله و رسوله

يبقى نصيبه الخسران

و غضب الله هيطوله

بالحب هواجه قسوتكم

و لا يمكن أبدا هاعاديكم

مش عايز إلا محبتكم

و تراعوا الله فيا و فيكم

الله دايما بالحب

بيسقي القلب العطشان

بالصدق و طيبة القلب

هتعيش مرتاح فرحان

إياك تكره بني آدم

و تقول بتحب الله

ده الله هو اللي خلقنا

و لا لينا رب سواه