كان ليا زمان صديقين

في صفاتهم مختلفين

واحد بيحب الدنيا

وواحد بيحب الدين

الأول دايما كان

بيفكر أوي في الهجرة

لكن مش للرحمن

كان هدفه كله المادة

كان غرضه يحسن وضعه

و يعيش عيشة مرتاحة

كان هدفه يزود دخله

بسرعة مش بالراحة

مع أول فرصة سافر

و اتحمل مُر الغربة

اتحمل علشان خاطر

يقبض بالعملة الصعبة

و اتحسن فعلا دخله

و فلوسه بقت بالكوم

لكن بعدته عن أهله

و خاصم عيونه النوم

نسي أن حقيقة خلقه

أصلا عرفان و عبادة

و أنه في بعده عن ربه

عمره ما هيلاقي سعادة

نسي أنه مهما يحوش

و يكنز كده في المال

هيقابل ربه مفلس

و يشوف أصعب أهوال

و التاني كان كده عايش

دايما راضي و قنوع

و لا عمره قال أنا عايز

و حياته خضوع و خشوع

بيحب كل أصحابه

و همه كمان بيحبوه

كان كل الناس أحبابه

كانوا جدا بيعزوه

دايما كان هدفه الخدمة

كان عايش كده متفاني

كانت باينة عليه النعمة

و عمره ما كان أناني

كان دايما شاغل باله

ازاي يستثمر وقته

كان دايما راضي بحاله

كان دايما حامد ربه

اتقال قُدامه في مرة

إن الهجرة مطلوبة

راح سائل أوي و بسرعة

إيه البلد المطلوبة

و اتوجه فورا ليها

ساب شغله و كل حياته

صمم يستثمر فيها

أحلى أيامه و أوقاته

واجهته طبعا صعوبات

و قاسى كتير و قليل

كان دايما في الأزمات

بيناجي ربه بالليل

كان متوكل على ربه

و لا عمره زعل و اتكدر

كان دايما يدعي و طلبه

قلوب الناس تتغير

ربنا كرمه بزيادة

بالحب و بالخيرات

كانت كل حياته عبادة

و مُتحلي بأحلى صفات

ربنا أيد خطواته

و رزقه الزرية الصالحة

و اتوفق أوي في حياته

و ملاها سعادة و فرحة

ما هو ده جزاء المتمسك

دايما بطريق الله

فرحة و سعادة كبيرة

و رضا و توفيق الله