ربي حبيبي عايز أتعلم

إزاي أقول من غير ما اتكلم

إزاي أخللي حياتي مثال

و ليك  بالروح و القلب أسلم

أول حاجة تنضف قلبك

و تخليه جيد و منير

تلقى ربك دايماً جنبك

و في تعاليمه كل الخير

خليك منصف تبقى سعيد

و الخير هيجيلك و يزيد

إرضي ربك و إنسى رضاك

مش كله هييجي على هواك

إعرض عن نفسك و اتمنى

قرب الرب ده هو الجنة

حب الله ده حصن أمان

أدخل يلا بسرعة أوام

إرضى باللي ربك جابه

و ما تطلبش حاجة زيادة

ما هو ربك عنده أسبابه

خللي رضاك بأمره عادة

إوعاك تنسى عيوبك أبدأ

و تركز في عيوب الغير

فكر كده  في عيوبك دايماً

ده طريق للحب و للخير

إياك تنصح غيرك و أنت

ما بتعملش باللي تقوله

أولى تنصح نفسك أنت

و تعمل بيه مش بس تقوله

حاسب نفسك قبل النوم

 واعملها كده كشف حساب

قبل يا عم ما ييجي اليوم

و تندم و تقضيها عذاب

إفرح بالقرب من الله

و إحزن لو تبعد عنه

ده أحلى طريق مرضاة الله

إسعى و قرب أكتر منه

خلي كلام الله يهديك

و ينور لك أيامك

و اعمل بيه الله يخليك

و خليه دايماً قدامك