حكاية كوميدية و لكن تدعو للبكاء
كتبهاAhmed Helmy ، في 16 سبتمبر 2008 الساعة: 14:29 م
الشاب البهائي : ما عنديش يا فندم لأنني بهائي و زي ما حضرتك عارف البهائيين مش مسموح لهم استخراج بطاقات الرقم القومي لكن أنا معايا بطاقة شخصية ورقية قديمة و مكتوب فيها ديانتي و عنواني القديم
الضابط : طبعا البطاقة الورقية دلوقتي غير معترف بيها لكن وريني كده مكتوب فيها إيه ؟ ده أنت خريج هندسة و على كده بتشتغل فين ؟
الشاب البهائي : للأسف أنا ما باشتغلش شغل ثابت لأن زي ما حضرتك عارف أي شغل محتاج أوراق رسمية و كل الأوراق الرسمية معتمدة على بطاقة الرقم القومي و أنا ما عنديش بطاقة رقم قومي زي ما قلت لحضرتك
الضابط : أمال عايش ازاي و بتاكل منين ؟
الشاب البهائي : و الله يا فندم باصلح أجهزة كمبيوتر للمعارف و الأصدقاء و باعمل دورات تدريبية في المنازل للتدريب على الكمبيوتر ما هي دي الشغلانة الوحيدة اللي مش محتاجة رقم قومي ، و الله يا فندم أنا حتى عندي استعداد أشتغل أي حاجة ان شاء الله حتى سواق لكن حتى دي ما قدرتش عليها
الضابط : و ليه ما قدرتش تشتغل سواق ؟
الشاب البهائي : ما هي يا فندم نفس المشكلة أنا مش قادر أطلع رخصة لأن ما عنديش بطاقة رقم قومي
الضابط : الله يكون في عونك يا بني طيب معلش أنا هاتغاضى عن موضوع بطاقة الرقم القومي و مش هاعملك مشكلة كفاية المشاكل اللي عندك لكن قول لي اللي معاك دول مراتك و بنتك ؟
الشاب البهائي : أيوة يا فندم
الضابط : طيب فين بقه عقد جوازك و شهادة ميلاد بنتك ؟
الشاب البهائي : و الله يا فندم أنا عندي عقد جواز بهائي لكن طبعا ما فيهوش أختام من الدولة لأن الدولة ما بتعترفش بالدين البهائي و لا بأن البهائيين موجودين أصلاً و علشان كده عقود الزواج بتاعتنا غير معترف بها
الضابط : طيب ازاي يعني عايشين من غير عقود زواج ؟ يعني ما تقدروش تثبتوا أنكم أزواج في أي مكان ؟
الشاب البهائي : أبداً يا فندم ما نقدرش نثبت ما عندناش غير العقد البهائي
الضابط : طيب و شهادة ميلاد بنتك فين ؟ على الأقل يمكن دي تثبت أنها بنتك و أكيد مكتوب فيها إسم الأب و الأم
الشاب البهائي : ما هي يا فندم نفس المشكلة طالما ما عنديش بطاقة رقم قومي و زواجنا مش معترف بيه ازاي كنت أقدر أطلع شهادة ميلاد لبنتي ؟
الضابط : نعم ؟؟؟؟؟ يعني حتى بنتك دي ما عندهاش شهادة ميلاد ؟ طيب أعرف منين أنك مش خاطفها و أتأكد ازاي أنها بنتك ما هو كل شيء بالعقل برده ؟
الشاب البهائي : و الله يا فندم مش عارف لكن و الله العظيم دي بنتي و مش عارف أثبت لك ازاي لكن و الله العظيم دي بنتي و لو كانت بتعرف تتكلم كانت قالت لحضرتك ده بابا و دي ماما لكن للأسف لسه صغيرة لكن لو حضرتك حددت لنا ميعاد بعد ستة شهور مثلاً علشان نقابلك ساعتها هيكون عندها سنتين و تقدر تتكلم و هي هتقول لحضرتك أني أبوها
الضابط : حضرتك بتهزر و لا إيه هو أنا هاستنى ستة شهور علشان أعرف إذا كانت بنتك و لا لأ ؟
الشاب البهائي : يا فندم طيب أعمل إيه ؟ أنا تحت أمر حضرتك و اللي تشوفه
الضابط : شوف يا بني بصراحة أنا متعاطف معاك و حاسس أنك إنسان محترم و مصدقك لكن أنت حالتك صعبة خالص لا عندك ورق يثبت شخصيتك و لا عقد جواز و لا شهادة ميلاد لبنتك و طبعا مش عارف تديها تطعيماتها تبع الصحة و لا هتعرف تدخلها مدرسة في يوم من الأيام لأنها مش موجودة أصلاً في سجلات الدولة و لا أنت و لا أمها كمان موجودين يعني أنتم تقريبا ً عايشين و مش عايشين طيب أنا هاقولك ما فيش غير حل واحد و احنا في رمضان و أنا نفسي أعمل خير أنا هاشتريلك تربة صغيرة كده تدفن نفسك فيها أنت و مراتك و بنتك بدل العيشة اللي أنتم مش عايشينها دي و ما عنديش لك حل تاني غير كده
الشاب البهائي : و الله يا فندم كتر خيرك ان حضرتك عايز تساعدنا لكن للأسف برده هتواجهنا مشكلة أننا مش هنقدر نستخرج شهادات وفاة لكن على كل حال أنا متشكر جدا جدا و الحقيقة احنا راضيين بكل اللي ربنا كتبه علينا لأننا مؤمنين به و بعدله و أكيد له حكمة في كل الصعوبات اللي بنتعرض لها و احنا دايماً بنفتكر كلام ربنا سبحانه و تعالى :
من كان لله كان الله له و من يتوكل عليه إنه هو يحرسه عن كل ما يضره و عن شر كل مكارٍ لئيم و إنك لو تسمع قولي و تستنصح بنصحي يرفعك الله إلى مقام الذي ينقطع عنك أيدي كل من على الأرض أجمعين
شكراً يا فندم و كتر خيرك على المساعدة
ـــــــــــــــــــــــــــــــــــــــــــــــــــــــــ
التصنيفات : خواطر | السمات:خواطر
أرسل الإدراج | دوّن الإدراج
نوفمبر 6th, 2008 at 6 نوفمبر 2008 1:39 م
استاذنك فى نشرها بمدونتى مع ذكر المصدر طبعا
فهى تعبر بحق عن حالة الابادة المدنية التى يعانى منها البهائيين المصريين
شكرا
نوفمبر 8th, 2008 at 8 نوفمبر 2008 6:22 ص
أهلا و سهلا بحضرتك
و طبعا ما فيش أي مانع من نشرها في مودنة حضرك ده شرف ليا
شكرا جزيلا
فبراير 23rd, 2009 at 23 فبراير 2009 9:37 ص
سلام احمد
واحشني ياطيب
عن ازنك ريد ان انشرها عندي في السودان
اكيد عرفتني
مارس 2nd, 2009 at 2 مارس 2009 6:30 ص
صديقي العزيز هيثم
طبعا فاكرك انت مش ممكن تتنسي يا صاحبي
أخبارك إيه واحشني جدا
سامحني على تأخيري في الرد كنت اليومين اللي فاتوا مشغول على الآخر
إنشر اللي انت عايزه يا صديقي ده شرف ليا
حقيقي واحشني جدا و نفسي أطمئن على أخبارك
تحياتي
أبريل 14th, 2009 at 14 أبريل 2009 5:53 ص
ان الدين عند الله الاسلام
يوليو 7th, 2009 at 7 يوليو 2009 2:00 م
بجد انت استاذ ورئيس قسم
يوليو 11th, 2009 at 11 يوليو 2009 8:57 ص
شكرا يا أستاذ محمود لتعليق حضرتك
شرفت المدونة بوجودك
فبراير 3rd, 2010 at 3 فبراير 2010 8:17 م
بجد الموضوع جميل تسلم ايدك يا احمد وتسمحلى انشرها عندى ؟
فبراير 7th, 2010 at 7 فبراير 2010 6:58 ص
ألف شكر لحضرتك و آسف جداً لتأخيري في الرد
و طبعاً أهلا و سهلاً بحضرتك و ما فيش أي مانع من نشرها في مدونتك
تحياتي
أغسطس 23rd, 2010 at 23 أغسطس 2010 9:46 م
إزاى هو مش عارف ىطلع شهادة ميلاد لبنته و هو خريج هندسة يعني كان ليه هو شهادة ميلاد
أغسطس 26th, 2010 at 26 أغسطس 2010 12:29 م
الأستاذ الفاضل
معظم البهائيين في مصر كان لديهم شهادات ميلاد ورقية و المشكلة الحقيقية و المعاناة لم تظهر إلا بعد ظهور الرقم القومي و الذي يحتاج إلى شهادة ميلاد رقم قومي (مميكنة )
شكراً
سبتمبر 20th, 2010 at 20 سبتمبر 2010 7:57 م
القصة جميلة لكن فيها شوية عيوب
شاب بهائى مش هيقول و الله و مش هيستشهد بآية قرآنية
أتمنى اعادة صياغة القصة
مع خالص تحياتى
سبتمبر 21st, 2010 at 21 سبتمبر 2010 2:21 م
شكراً لرأي حضرتك
و لكن اسمح لي أسألك ما المشكلة أن يقول البهائي و الله مادام يؤمن بالله الواحد الأحد
و على فكرة و لمجرد التوضيح الآية المذكورة في نهاية القصة ليست من القرآن الكريم و لكنها من ألواح حضرة بهاء الله
و لو أنني أيضاً لا أرى ما يمنع من الاستشهاد بآيات القرآن الكريم ما دام كل البهائيين يؤمنون بالقرآن الكريم و بسيدنا محمد صلى الله عليه و سلم و بأنه من عند الله كما نؤمن أيضاً بجميع الديانات المنزلة من عند الله و نحترمها و نؤمن أن مصدر جميع الأديان هو الله الواحد الأحد الذي لا شريك له
شكراً جزيلاً لمشاركة حضرتك
نوفمبر 21st, 2010 at 21 نوفمبر 2010 7:30 م
انا مش مقتنع بموضوع البهائيين دول
لأن الرسول الكريم سيدنا محمد صلى الله عليه وسلم هو خاتم الانبياء .
واللى انتو بتقولوه ده مالهوش اساس من الصحه او الواقع
ده تأليف .
مع خالص احترامى
نوفمبر 21st, 2010 at 21 نوفمبر 2010 7:33 م
ده غير ان حضرتك اسمك احمد يعنى على اسم الرسول الكريم محمد .
لأن اسم احمد هو اسم من اسماؤه صلى الله عليه وسلم
نوفمبر 22nd, 2010 at 22 نوفمبر 2010 9:17 ص
الأستاذ مجهول
ما حدش طلب من حضرتك تقتنع بالبهائية و دي حريتك أن تؤمن بما تشاء كما هي حريتنا أن نؤمن بما نشاء و في النهاية الله سبحانه و تعالى هو الحكم
و لكن اسمح لي أقولك أن مش معنى أنك لست مقتنع بالبهائية أن تقول أنها تأليف لأن هذا سيجرح قلوب معتقديها و المؤمنين بأنها دين من عند الله و أنا واحد منهم
ثانياً أنا ما اتكلمتش غير عن الحقوق المدنية للبهائيين المصريين اللي ما حدش يقدر ينكر عليهم حقوقهم و لم أتكلم عن الدين نفسه أو احاول إقناع أحد و لا أفهم لماذا كان تعليقك لا علاقة له بالموضوع
شكراً و أرجو احترام عقائد الآخرين كما تحب أن يحترموا عقيدتك
تحياتي
يوليو 15th, 2011 at 15 يوليو 2011 11:06 ص
يقول عز وجل(ان الدين عند الله الاسلام)
اتق الله يا اخي..