صديقي ده إنسان

طيب و قلبه نظيف

بيحب ربي كمان

كريم أوي و لطيف

مشكلته دايماً إنه

أعصابه تفلت منه

يغضب أوي و يتنرفز

و يزعل الناس منه

واخد الحياة بجدية

أكتر من اللازم

دايماً باشوفه مكشر

و في كل الأمور حازم

و أي حد بيغلط

بيحاسبه و يعاتبه

و هو نفسه بيغلط

و شاهد عليه ربه

يا صاحبي خليك رايق

و حبب الناس فيك

بلاش تكون متضايق

و ربنا يهديك

حياتنا حلوة بجد

و ربي كارمنا

و نعمه مالهاش حد

لو فيها فكرنا

خليك مصدر سعادة

لكل أحبابك

خليها تبقى عادة

و افتح لها بابك

ساعات برغم الحب

بنزعل أحبابنا

نقضي حياتنا في كرب

و نضيع شبابنا

ده العمر حقه قصير

مهما طال الزمن

و فضل ربي كبير

و هو علينا أحن

فكر في أعمالك

و حاسب نفسك يا صاحبي

تبقى هنيالك

و تزيد غلاوة في قلبي

ده الحب ده ثروة

و حقيقي كنز كبير

من ربي ده نعمة

و لحب ربي أسير

إبدأ يومك يا صاحبي

ببسمة حلوة جميلة

بيها تنور حياتك و حياة كل العيلة

دي حياتنا مهما طالت

أيامنا فيها قليلة

خللي البسمة عنوانك

خليك دايماً سعيد

راح تحلى بيها أيامك

و تقرب لك البعيد

دي نصيحة من صديقك

هتجيب نتيجة أكيد